Penembu East Malaysia’s First Integrated Cement Plant nyaup nambahka pemansut simen CMSB

TANGGUNPENGAWA RAMA: Ahmad Alwee Alsree (kiba) nyuaka replika chek
RM20,000 ngagai SK St Augustine seraya disempulang Richard (tiga ari kiba)
enggau Awang Tengah. — Gambar Chimon Upon

TANGGUNPENGAWA RAMA: Ahmad Alwee Alsree (kiba) nyuaka replika chek RM20,000 ngagai SK St Augustine seraya disempulang Richard (tiga ari kiba) enggau Awang Tengah. — Gambar Chimon Upon

KUCHING: Kilang Semin Bersepadu keterubah di Malaysia Timur ke diempu Cahya Mata Sarawak Berhad (CMSB) deka mantu nambahka asil semin ke dikeluarka kompeni nya ngagai urung 2.75 juta tan metrik ninting taun.

Cahya Mata Sarawak (CMS) Group Managing Direktor, Dato Richard Curtis madah, enggau penumbuh sereta penemu kilang semin nya endang dikearapka ulih napi peminta guna di nengeri.

“Kilang ti ketiga tu (Kilang Simen Bersepadu) deka nambahka penyampau kapasiti asil simen CMSB ti urung 60 peratus ngagai 2.75 juta tan metrik ninting taun lalu penyampau kitai nya tinggi agi ari peminta menua tu diatu ti urung 1.7 – 1.8 juta tan metrik.

“Tu deka ngulihka CMSB napi peminta semin di Sarawak, nyengkaum ari projek besai baka tekad Baleh enggau Jalai Besai Pan Borneo, lalu ulih ngurangka risiko suntuk bekal semin, dikena ngerembika bekal ngagai makit luar sereta dikena ngasilka lebih ari sebansa semin,” ku iya.

Richard mansutka pekara nya dalam jaku pengelalu ba pengawa bejadika East Malaysia’s First Integrated Cement Plant, CMSB ke diatur ba CMS Clinker Plant, Jalai Mambong, Jalai Puncak Borneo ditu, kemari.

Kilang nya udah mujur dipenyadika Menteri Pengatur Pengeraja Asal enggau Rampa Menua Kedua Datuk Amar Awang Tengah Ali Hassan, ngarika Kepala Menteri Datuk Patinggi Tan Sri Adenan Satem.

Nambahka nya ku Richard, beduduk kuantiti utai ti dibuai mayuh di nengeri tu, tiga kilang simen CMSB deka ulih ngena baru utai ti dibuai nya enggau rengka dikena begaga sereta jalai alun, ke lalu ulih ngurangka tikas penyampau barang ke dibuai industri.

Nitihku iya, duit ke udah diperanakka CMS dalam Bahagian Simen pengelama 10 taun ke udah, udah ngeluai RM300 juta, asil ari pengawa numbuhka kilang klinker, terminal nyimpan di Miri enggau Sibu, ngangkatka pemanah kilang, tiga buah kilang ngangkut semin enggau ke baru ke baru iya nya Kilang Semin Bersepadu.

“Semua ngayanka pemesai tanggungpengawa CMSB ti datai ari penuduk ke nyadi penyedia barang ngagai rumah di menua tu.

“Kami mega nguji nyadi raban korporat ti megai tanggungpengawa sereta ngerapitka kaul enggau rayat, ngurangka asap kamah sereta nentuka semin bekualiti nunda rega makit, ti enda nemu abis,” ku iya.

Nyerumba pengerami tu kemari, Awang Tengah diberi basa ngemataka pengawa nyain Sempekat Pemereti Ati (MoU) entara CMS Clinker Sdb Bhd (ti diarika Chairman CMS Clinker Sdn Bhd Datuk Syed Ahmad Alwee Alsree enggau Ketuai Pemesai Eksekutif CMS Badi Semin Goh Chii Bing) enggau ZGA Environment Sdn Bhd (ti diarika Pengari Koporat Dato Jamelah Jamaluddin enggau Menijar Besai, Bernard Yong), ti deka berundingka pengawa ngena tayar getah ti dilumat nyadi pemansut kuasa alternatif ba asil ke dikeluarka klinker.

Objektif MoU nya senipak enggau juluk CMSB ti deka terus ngemeratka ‘program kelestarian’.

Kelimpah ari nya ba pengerami ke sebaka CMSB nengah Datuk Syed Ahmad Alwee Alsree nyuaka chek RM20,000 ngagai tetiap sebuah buah sekula ti mungkur empat buah sekula dalam kandang menua Mambong iya nya SK St Francis Xavier, SK St Augustine, SK Sitang Petag enggau SJK Chung Hua Batu 15.

LikeTweet

Source: http://miri.my/2016/11/09/penembu-east-malaysias-first-integrated-cement-plant-nyaup-nambahka-pemansut-simen-cmsb/