SIBU: Kaban makai kaban baka nya meh penusah ke nyadi ba siku lelaki ke bejalaika pengawa meli getah ba sebengkah genturung rumah panjai ditu, apin lama tu tadi.
Penusah tu nyadi bepun ari iya (orang meri ripot) enggau bakih iya nerima duit RM9,000 ari siku ti ngasuh seduai bekenaka duit nya meli getah ari mensia mayuh ba genturung rumah panjai nya.
Tang bakih iya tu makai duit nya kediri enda nitihka semaya, bekenaka duit nya kena meli getah.
Sepengudah iya nemu pekara nya nyadi, dia iya lalu terus nanya bakih iya tang bakih iya agi bejaku bebula.
Nyau ke pemuas, bakih iya tu tadi lalu nerang pekara kebendar iya nya udah ngena duit nya, lalu bepun ari nya, orang ke ngaga ripot tu ngasuh bakih iya mayar duit nya.
Kelimpah ari suah nagih, dia bakih iya ngelawa rumah bakih iya (orang ngaga ripot) ba Sibu Jaya ti dipadahka endur iya diau tang datai bakih iya tu tadi ukai semina enggai mayar duit nya tang deka nimbak iya enti nyema agi nagih duit nya ila.
Berindik ari nya, iya ngaga ripot polis lalu diatu kes nya agi dipansik enggau nyemetak.